ما هي بطانة الرحم المهاجرة؟
بطانة الرحم المهاجرة هي حالة شائعة وممكن تصيب 15٪ من النساء.
بطانة الرحم المهاجرة ممكن تكون مؤلمة وموجعة جدا. دي حالة فيها بطانة الرحم بتتحرك وتتزرع وتنمو في أماكن تانية غير الرحم. ممكن نلاقيها في قناتي فالوب والمبيضين والأمعاء والمثانة.
في الوضع العادي في ميعاد الدورة، يتم التخلص من بطانة الرحم وطردها من المهبل. في السيدات اللي بتعاني من بطانة الرحم المهاجرة، مفيش فتحة متاحة علشان تطرد بطانة الرحم للخارج. لما الدم ده يتحبس، هيعمل التهاب وخراجات وأنسجة مجروحة.
أعراض بطانة الرحم المهاجرة الأكثر شيوعاً
كل سيدة ممكن تحصلها أعراض مختلفة. يعني في سيدات مش هتحس بأي أعراض، وسيدات تانية هتجيلها دورة مؤلمة جدا وألم أثناء ممارسة الجنس. الأعراض ممكن تحصل في أي وقت في الشهر زي مثلا عند التبول أو أثناء حركات الأمعاء. أكتر ألم صعب هو اللي بيكون قبل الدورة من خمسة إلى سبعة أيام وممكن يفضل مستمر معاكي لمدة يومين او ثلاثة من أيام الدورة.
%60 من السيدات اللي عندها بطانة الرحم المهاجرة بيكون عندهم ألم وصعوبة عند ممارسة الجنس. الأعراض عادة بتتحسن بعد الحمل لما الدورة الشهرية بتوقف في فترة الحمل.
بطانة الرحم المهاجرة ممكن تأثر على نوع الحياة يعني بتمنع السيدات تخطط فسح او سفريات في وقت قريب من الدورة الشهرية. سيدات كتير بيضطروا ياخدوا اجازة من الشغل وقت الدورة بسبب الألم الشديد، بس الغياب المتكرر ده ممكن يسبب مشاكل في مكان العمل.
أكثر الأعراض المشهورة لبطانة الرحم المهاجرة هي:
- الدورة مؤلمة جدا (عسر الطمث)
- الدورة ثقيلة
- الجنس المؤلم (عسر الجماع)
- ألم في الظهر
- غثيان
- إرهاق
- مشاكل الجهاز الهضمي مثل الإسهال والانتفاخ وحركات الأمعاء المؤلمة.
- العقم
- ألم عام في منطقة الحوض
كيف تساعد التغذية في تخفيف أعراض بطانة الرحم المهاجرة؟
النظام الغذائي الصحي أثبت انه ممكن يقلل من الأعراض. النظام الغذائي اللي بيحتوي على الأحماض الدهنية الأساسية المضادة للالتهابات أثبت فعاليته. أوميغا 3 كويس جدا في تقليل الالتهابات.
المغنيسيوم وفيتامين B وفيتامين E بيساعد في تخفيف الألم. التقليل من التعرض للاستروجين البيئي ده هيساعد برده في تقليل لخبطة الهرمونات.
انك تظبطي مستوى السكر في الدم هي الخطوة الأولى في ضبط الهرمونات. ممكن تحققي ده عن طريق انك تاكلي وجبات منتظمة صغيرة وسكرها قليل وفيها الكربوهydرات المعقدة والبروتين والدهون الصحية. لو بعدتي عن الأطعمة اللي فيها نسبة عالية من السكر هيساعد ان مستوى السكر في دمك ميعلاش.
1. فيتامين B: لتوازن الهرمونات وتخفيف الألم
فيتامين B مهم جدا، الكبد بيستخدمه علشان يحول هرمون الاستروجين الزيادة إلى أشكال أضعف وأقل خطورة. فيتامين B6 بيقلل بشكل كبير من شدة ومدة آلام الدورة الشهرية ودي مصدر قلق رئيسي للسيدات.
فيتامين B مع الزنك ضروري في تحويل الأحماض الدهنية الأساسية إلى البروستاجلاندين (PG) اللي بيعمل استرخاء لعضلات الرحم ويقلل الألم. الأحماض الدهنية الأساسية زي اللي موجودة في الأسماك الزيتية والمكسرات والبذور بتحتاج إلى فيتامين B علشان تحول الدهون الأساسية دي إلى شكل ممكن الجسم يستخدمه وينتج نوع “جيد” من البروستاجلاندين. من غير التحويل ده، جسمك هينتج النوع “السيئ” بس من البروستاجلاندين اللي ممكن يزود من آلام الدورة الشهرية ويزود من الالتهاب.
فيتامين B موجود في الحبوب الكاملة والبقول والخضروات الورقية.
فيتامين B6 موجود في:
- القرنبيط
- الكرنب
- الفلفل بأنواعه
- الموز
- قرع العسل
- البروكلي
- نبات الهليون
- العدس
- الفاصوليا الحمرا والبيضا
- البصل
- المكسرات
- البذور
2. فيتامين E: لتقليل آلام الدورة الشهرية
ده فيتامين مهم جدا لبطانة الرحم المهاجرة وثبت أنه بيقلل من “آلام الدورة الشهرية” عند 70٪ من النساء خلال دورتين. أفضل المصادر لفيتامين E هي الأفوكادو والسالمون والسردين والبطاطا الحلوة واللوز والكاجو وبذور دوار الشمس والزيتون وزيت الزيتون.
3. المغنيسيوم: لإرخاء العضلات وتقليل التقلصات
المغنيسيوم يعتبر مرخي للعضلات وبيقلل من تقلصات الدورة الشهرية. ممكن يتاخد من خلال الاطعمة أو كمكمل غذائي. المغنيسيوم فيه ميزة انه ممكن يمتص من خلال الجلد علشان كده ممكن يتعمل منه مستحضرات تتدهن وبخاخات وحمامات ملح إنجليزي.
4. أوميجا 3: لمقاومة الالتهابات
أوميجا 3 هو واحد من أقوى مصادر الطعام المضادة للالتهابات. بننصح جدا تاكلي حصتين على الأقل من الأسماك الزيتية في الأسبوع. لو كنتي مبتاكليش السمك ، ف الفيتامينات هتكون مفيدة. الفيتامين اللي فيه أكثر من 500 ملغ من EPA و DHA ده مفيد جدًا.
نصائح إضافية لتقليل الالتهاب ودعم الجسم
دعم الكبد لطرد الاستروجين الزائد
الكبد هو العضو المكلف انه يشيل الأستروجين الزيادة من جسمك. ممكن تساعدي وتدعمي وظائف الكبد عن طريق اكل الأطعمة اللي من عائلة براسيكا زي؛ الكرنب والبروكلي.
من المفيد برده شرب ماء بليمون سخن مع العسل وعليها شوية كركم وجنزبيل أول حاجة الصبح بدري علشان تنظفي الجهاز الهضمي بتاعك في بداية اليوم.
الحد من الاستروجين البيئي (زينو استروجين)
زينو استروجين او الاستروجين البيئي ممكن يسبب بطانة الرحم المهاجرة. حاولي دايما تاكلي الاكل العضوي لأن المبيدات الحشرية فيها مستويات عالية من زينو استروجين. حاولي كمان تستخدمي مستحضرات تجميل طبيعية ومنتجات نظافة شخصية طبيعية لو موجودة.
أهمية الرياضة في تخفيف الألم
التمارين بتخفف من آلام الدورة الشهرية للي عندهم بطانة الرحم المهاجرة، عن طريق انها بتزود الدورة الدموية في منطقة الحوض. هي كمان بتطلع الإندورفين وبتقلل الإجهاد اللي بيزود الأعراض عند سيدات كتير. الإندورفينات هي مسكنات طبيعية للجسم بتساعد على تخفيف الألم وبتؤدي إلى حالة ذهنية أكثر هدوءًا.
من أين أبدأ؟ خطوات عملية
ابدأي بتغيير خطوات صغيرة في أسلوب حياتك اليومية. حاولي تمشي لمدة عشرين دقيقة كل يوم.
- ضيفي الانشوجة والسردين إلى السلطة الخضراء.
- جربي تاكلي سمك السلمون مرة أو مرتين في الأسبوع.
- جرب فيتامين B وأوميغا 3.
- خلي المكسرات والبذور في متناول ايدك لوجبة خفيفة صحية سريعة.
لو انتي حاسه انك محتاجه مساعدة وتوجيه اكتر، متتردديش انك تتواصلي معايا علشان اعملك خطة أكل شخصية كاملة.