ما هي جودة البويضة ولماذا هي مهمة لنجاح الحمل؟
جودة البويضة تعتبر واحدة من أهم العوامل اللي بتحدد نجاح الطرق الخارجية للمساعدة في الحمل (ART). البويضة هي المسؤولة عن معظم التفاعلات الحيوية التي بتحصل بعد الإخصاب علشان تكون الجنين.
البنات بتتولد وعندها بويضات في المبايض و بيتشكلوا في الشهر الرابع في الرحم. بما أن البويضات فيها نصف عدد الكروموسومات الموجودة في باقي خلايا الجسم، فهي بتخضع لنوع خاص من انقسام الخلايا اسمه الانقسام الاختزالي. في خطوات كتيرة بتحصل في الانقسام ده والبويضات بتقف عند مرحلة معينة ومش بتنقسم تاني لحد ما يحصل الإخصاب.
كيف يؤثر التقدم في العمر على جودة البويضات؟
علشان كده، مع التقدم في العمر، الحمل ممكن ياخد وقت أطول بكتير علشان يحصل، لأن الخلايا واقفة مش بيحصلها انقسام بقالها سنين، فهتاخد وقت لغاية ما يحصل الإخصاب.
على الرغم من أن الإنسان بقي يعيش حياة أطول، لكن الوقت اللي بيكون فيه البويضات سليمة فضل زي ماهو وجودة البويضة بتبدأ تقل في سن مبكر اللي حد ما، في حوالي السابعة والعشرين. الجودة بتقل مع تقدم السن وبتقل أكتر بعد سن 35.
بس بالرغم من كده، لو اخدتي مضادات الأكسدة وزودتي الفواكه والخضروات الطازة ، ده هيساعد على حماية جودة البويضات.
لماذا يعد تحسين جودة البويضات أمراً حيوياً؟
البويضة السليمة ضرورية علشان هي اللي بتتطور وتبقي جنين قابل للحياة. لو جودة البويضة ضعيفة ممكن نمو الجنين يقف.
في حالات معينة زي تكيس المبايض (PCOS)، بويضات كتير ممكن تنمو كل شهر. في العادة بيرتبط زيادة عدد البويضات بانخفاض جودتها. ولما بيكون عمر الأم الكبير هو السبب الأساسي للقلق، فإن جودة البويضات هي الحاجة الوحيدة اللي ممكن نحاول نحسنها.
دور التغذية في تحسين جودة البويضات
النظام الغذائي اللي بيركز على مضادات الأكسدة والفيتامينات والمعادن هيحسن كتير من جودة البويضات.
1. مضادات الأكسدة: خط الدفاع الأول
مضادات الأكسدة مهمة جدا علشان تحمي البويضات الناضجة من التلف. لما البويضه بتنضج بيتم تغليفها بالسوائل في حويصلة اسمها حويصلة غراف. السائل ده غني بمضادات الأكسدة. المعادن زي الزنك والسيلينيوم وفيتامين C وفيتامين E لها تأثير مضاد للأكسدة.
نظام الاكل اللي مفيهوش فواكه وخضروات طازة ومكسرات وبذور، ده هيأثر بالسلب على جودة البويضات. من المهم برده “ناكل قوس قزح” علشان ناكل مجموعة متنوعة من الفيتامينات والمعادن.
2. الزنك: معدن أساسي للخصوبة
الزنك هو واحد من أكثر المركبات المضادة للأكسدة في الجسم. نقص الزنك شائع في العالم كله. الزنك موجود في اللحوم والحمص والمكسرات والبذور. الأشخاص اللي عندهم مشاكل في الجهاز الهضمي ومشاكل في المعدة معرضين للخطر بشكل اكبر لأن مثبطات مضخة البروتون (PPI) ممكن تمنع امتصاص الزنك. الأكل النباتي ممكن يزود قيمة الزنك عن طريق النقع والبراعم والتخمير.
3. السيلينيوم: لحماية البروتينات المضادة للأكسدة
السيلينيوم بيشكل عائلة مهمة من البروتينات المضادة للأكسدة. المكسرات البرازيلية مصدر رائع. واحدة بس من الجوز البرازيلي فيها الكمية اللى جسمك محتاجها في اليوم. السيلينيوم موجود برده في اللحوم والفراخ والأسماك والمحار والبيض.
4. فيتامين C و E: الثنائي الفعال
الفيتامينات دي من مضادات الأكسدة المهمة جدًا خاصةً عند النساء اللي فوق سن ال35. الاثنين فيتامين دول بيشتغلوا مع بعض وبيساعدوا في الخصوبة. فيتامين C موجود في الفاكهة والخضروات الطازة وخاصة الحمضيات. بنوصى انك تاكلي قطعتين من الفاكهة و 5 حصص من الخضار يوميًا.
فيتامين E موجود في اللوز والأفوكادو وبذور عباد الشمس والسلمون والبطاطا الحلوة والزيتون وزيت الزيتون.
5. الأنزيم المساعد Q10 (CoQ10)
الأنزيم المساعد Q10 هو مضاد للأكسدة مهم في انه يحافظ على جودة البويضة خاصة مع تقدم السن. لو اخدتي الإنزيم المساعد Q10 لمدة ثلاثة أشهر هيحسن من نتائج الخصوبة في عمليات الحمل المساعدة .
عوامل أخرى تؤثر على مخزون مضادات الأكسدة
من المهم أنك تلاحظي أن زيادة الوزن أو التوتر أو لعب الرياضة المفرطة ممكن تستنفد جسمك من مضادات الأكسدة حتى لو كنتي بتاخدي الكمية الموصى بها.
لو كان عندك تكيس المبايض، ممكن تستفيدي لو قريتي مقالاتي عن أنواع الأطعمة اللي هتفيدك في الحالة بتاعتك.
كيف يتم تقييم جودة البويضات في مركز السامي؟ (الاختبارات)
لو كنتي هتعملي عمليات حمل مساعدة، ف دكتور أمراض النساء بتاعك ممكن يطلب منك ملف هرموني، ويحتاج إلى فحص بالموجات فوق الصوتية ويطلب منك تعملي اختبار دم لهرمون (AMH).
الاختبار ده علشان ياخد فكرة عن احتياطي مخزون المبيض، ووفقًا لعمرك و AMH في اختبار الدم، ممكن يعمل تقدير لجودة البويضات.
أبدأ منين؟ نصائح عملية لتبدأي اليوم
ابدائي انك تعملي تحسينات صغيرة و تدريجية في نظام أكلك. انتي مش مضطرة تمنعي كل الاكل اللي بتحبيه وتاكلي بس الاكل المسلوق. قاعدتي العامة هي؛ أنك تحاولي دائمًا تزودي حاجة خضراء في كل وجباتك.
مجرد إضافة الخضروات والفواكه الطازة في روتين اكلك المعتاد ده أمر سهل ومفيدًا جدًا. من المفيد برده تتعودي على انك تأكلي كميات صغيرة من المكسرات والبذور علشان تستفيدي بالمواد الغذائية اللي فيها وتساعد علي ثبات مستوى السكر في الدم.